БЛУКАЧ у ВКЛЦ. Адкрыцці паўз Аршанку

ВКЛЦ - Вяликае княства Лепельскага Цмокаі

 А што адкрываць, калі, здаецца, ужо ўсё аблазіў? Але ці ўсё? Напрыклад, не абследаваў мясцовасць у квадраце Вялікі Поўсвіж - Залессе - Баравенскія Хутары - Паддуб’е, паколькі лічыў, што там, апрача раллі і хмызу, нічога цікавага няма. Прасцей кажучы, буду даследаваць прастору паміж дарогай на Валосавічы і Аршанкай.

Амерыку не адкрыю, але для сябе і наведнікаў сайту штосьці незвычайнае знайду. Пачну з Паддуб’я.

Перад Паддуб’ем трэба крыху даць назад, каб звярнуць на прасёлак. Хутка пачынаецца вёска-прывід Масцішча.

Усё, што засталося ад доўгай вёскі - гэта старыя садовыя дрэвы ды падмурак хаты Леаніда Трубчанкі.

Падрабязна пра вёску-прывід можна прачытаць у маім рэпартажы Мостище - деревня-призрак

Ішоў полем.

Ішоў балотам.

Ішоў джунглямі.

А адкрыцця ўсё не было. Але, што гэта за след?

Несумненна, бабёр спілаваў дрэва і цягнуў яго да сваёй хаты па свежым снезе. Вось яно, адкрыццё! Усё жыццё думаў, што бабры будуюць хату звонку. Аказваецца, што пасля здачы яе ў эксплуатацыю працягваюць упарадкаваць жыллё знутры, зацягваючы будматэрыялы праз нару пад лёдам. След ад голля вядзе ў дзірку.

Адкрыццё для сябе зрабіў. Але не паспеў ацаніць яго значнасць, як здзейсніў другое: леснікі лес пасадзілі на месцы неўрадлівага поля.

Чым далей у лес, тым болей дроў. Пачынаецца вялікі ельнік.

Хто ведаў, што ў гэтай бязлеснай мясцовасці ў хуткім часе зашуміць пушча? Бясконцай будзе яна - канца краю няма лесапасадкам. Нават малакаштоўныя лісцёвыя дрэўцы выразаюць, каб не заміналі расці елкам.

Вось дзе сапраўднае адкрыццё! Не паспеў яму нарадавацца, як яшчэ болей уразіўся - і сасновы бор расце.

Але раней за мяне тут пабылі быдларусы і палову сосніку спалілі.

І ўжо непадалёк ад Капішча знайшоў схаваную ў кустах і балоце невядомую дагэтуль сажалку. Можна ўлетку на рыбу прыйсці.

Таксама адкрыццё! Задача выкананая. Можна спакойна наведаць Капішча.

Маркотна, мабыць, Перуну зімаваць у самоце. Як і Следавіку, бо яны адзін другому не пара - культавыя аб’екты пакланення з розных эпох.

А цяпер можна і адпачыць пад Перуновай гарой.

Дзень прайшоў выдатна – процьму адкрыццяў зрабіў. Вось і вер пасля ўсяго, што ўжо адкрываць няма чаго, бо ўсё даўно адкрыта. Але Вяікае княства Цмока Лепельскага вялікае, нават Блукач Валацужны не ў кожным куточку пабыў. Што тады казаць пра пафігістаў?